Detaje për pilotin, trupi i të cilit ende nuk është gjetur

Hetimet për të gjetur shkaqet e vdekjes së futbollistit argjentinas Emiliano Sala në Kanalin e La Manshit më 21 janar vazhdojnë, kurse mediat britanike kanë zbuluar detaje të reja.

Siç njofton BBC, piloti i aeroplanit, David Ibbotson ishte daltonik dhe për këtë arsye nuk kishte leje për të fluturuar në orët e mbrëmjes, por vetëm gjatë paraditeve.

Siç është njoftuar edhe më herët Ibbotson kishte licencë për fluturim privat nga Britania e Madhe në SHBA, por nuk i lejohej që të merrte pasagjerë në fluturimet e tij në vendet e Bashkimit Evropian.

“Daltonizmi nuk e lejon një pilot që të marrë licencën e fluturimit gjatë orëve të mbrëmjeve, sepse të dallosh ngjyrën e kuqe nga e gjelbra në errësirë është thelbësore për ta bërë një gjë të tillë”, shpjegon një burim i BBC, përcjell albinfo.ch.

Gjithsesi ende nuk ka konfirmime nga Enti i Aviacionit Civil Britanik në lidhje me këtë detaj, duke qenë se ky institucion nuk ka dashur të japë detaje, por drejtuesit e “Air Accidents Investigation Branch” kanë deklaruar se licencat e pilotëve vazhdojnë të jenë në qendër të hetimeve.

Trupi i Emiliano Salës ishte gjetur mes mbetjeve të avionit në ishullin Guernsey më 6 shkurt, ndërsa ai i pilotit ende rezulton të jetë i zhdukur.

Kërkimet u ndërprenë për disa ditë dhe vetëm me anë të financimeve private vazhduan, ku u gjet trupi i futbollistit të Nantes, i cili kishte nënshkruar kontratë me Cardiff, por nuk arriti t’iu bashkëngjitej.

Mes këtyre dy skuadrave po vazhdon beteja për 15 milionë funte.