Detajet e policisë për vrasjen e Liridona Murselit dhe arrestimin e bashkëshortit të saj

Policia e Kosovës dhe Prokuroria Themelore e Prishtinës kanë dhënë detaje për vrasjen e Liridona Murselit dhe arrestimin e bashkëshortit të saj, Naim Murseli, bashkë me një person tjetër.

“Sipas urdhëresës së Prokurorit të Shtetit dhe me aprovim të gjyqtarit të procedurës paraprake, Njësiti i Hetimeve të Përgjithshme të Prishtinës, në kuadër të Policisë së Kosovës, kanë realizuar bastisje në dy lokacione në Gjakovë, me ç’ rast nga ky aksion janë arrestuar personat G.P. (dorasi) dhe N.M. (bashkëshorti i viktimës), të dyshuar në vrasjen e viktimës, si dhe është sekuestruar arma, e cila dyshohet të jetë përdorur në këtë rast”, thuhet në njoftimin e Policisë.

Aktualisht, të dyshuarit janë duke u intervistuar në stacionin policor, derisa ndaj të njëjtëve prokuroria do t’i ndërmarrë veprimet e mëtjme ligjore.

Prokuroria në koordinim me policinë po vazhdon me ndërmarrjen e veprimeve hetimore lidhur me këtë rast.