Detaje të tjera: Shaqiri në izolim, humb ndeshjet me Zvicrën

Ylli shqiptar ka rezultuar pozitiv me Covid-19 dhe do të izolohet për dhjetë ditë

Mediat zvicerane kanë bërë të ditur se Xherdan Shaqiri është infektuar me koronavirus.

Federata Zvicerane e Futbollit (SFV) ka dhënë edhe disa detaje të tjera.

“Xherdan Shaqiri ka dalë pozitiv në testin për COVID-19. Në konsultim me autoritetet shëndetësore, ai është në izolim. Masat strikte mbrojtëse dhe kërkesat e UEFA-s për ekipet kombëtare në përputhje me ‘Protokollin e UEFA-s për rikthim’ janë respektuar në mënyrë rigoroze prej se filloi. Duke u bazuar në këtë, sqarimet janë duke ardhur nga autoritetet shëndetësore se si të veprohet”, thuhet në njoftimin e Federatës së Zvicrës, përcjell albinfo.ch.

Gjendja e tij shëndetësore raportohet se është e mirë.

Në Zvicër, njerëzit duhet të qëndrojnë në izolim për të paktën 10 ditë nga momenti i shfaqjes së simptomave apo i vërtetimit të infektimit me koronavirus.

Zvicra ka programuar ndeshjen miqësore me Kroacinë të mërkurën, ndërsa më 10 dhe 13 tetor do të përballet me Spanjën dhe Gjermaninë në Ligën e Kombeve.

Futbollisti nga Gjilani bëhet futbollisti i tretë i Liverpoolit i infektuar me COVID-19, pas Thiago Alcantaras dhe Sadio Manes.

---