Dibra pret 11 mijë kurbetçinj gjatë verës

Sipas traditës, së pari vijnë bashkatdhetarët e SHBA-së, prej ku pritet të vijnë më shumë se tre mijë. Një numër i vogël tashmë kanë arritur

Më shumë se 11 mijë bashkatdhetarë që jetojnë në Shtetet e Bashkuara të Amerikës dhe në Evropë pritet të vijnë sivjet në rajonin e Dibrës, në Qendrën e Zhupës dhe rajonin e Rekës. Madje Shoqata e bashkatdhetarëve të këtij rajoni, thonë se kësaj vete kurbetçinjtë kanë paralajmëruar ardhje masive.

Ata thonë se pritet këtë verë në Dibër, Zhupë dhe Rekë të arrijnë mbi 11 mijë bashkatdhetarë të cilët pushimet verore do t’i kalojnë me të afërmit e tyre në vendlindje.

Sipas traditës, së pari vijnë bashkatdhetarët e SHBA-së, prej ku pritet të vijnë më shumë se tre mijë.

Numri më i vogël tashmë kanë arritur, por më masovisht priten kah fundi i këtij muaji, shkruan koalb.com, transmeton Albinfo.Ch.

Nga vendet perëndimore evropiane, më së shumti nga Italia, Gjermania, Zvicra dhe Luksemburgu, ku ka edhe më së shumti kurbetçinj ë nga ky rajon, duhet të arrijnë rreth tetë mijë. Ata vijnë më së shumti kah mesi i korrikut, ku në rajonin e Dibrës dhe Rekës dhe në Zhupë bëhen shumë festa.

Ndryshe, shqiptarët gjithandej Ballkanit janë shpërndarë nëpër shumë vende të botës. Sipas disa statistikave vetëm nga Shqipëria janë rreth 1.1 milionë mërgimtarë, shumica prej tyre të vendosur në Itali dhe Greqi, por edhe në SHBA. Edhe nga Kosova ka rreth 800 mijë mërgimtarë, ndërsa ky numër është i madh edhe në Maqedoni e viset tjera shqiptare.