Dimitrov: Marrëveshja ishte kompromis, NATO është siguri për Maqedoninë

Ministri i Punëve të Jashtme, Nikolla Dimitrov sot në fjalimin e tij para Komsionit për Çështje Evropiane, deklaroi se është e vërtetë se edhe më herët ndoshta kanë mundur të zgjidhet çështja e emrit , me ndonjë zgjidhje edhe më të mire, por duhet shikuar përgjegjësia pse nuk është pranuar ajo zgjidhje dhe pse janë humbur gjithë ato vite dhe gjenerata pa u zgjidhur kontesti për çështjen e emrit.

“Ne e bëmë propozim-ligjin për ratifikim të marrëveshjes, me procedurë të shkurtuar, për shkak se ditët janë në pyetje. Të martën kemi mbledhjen e ministrave të punëve të jashtme të Këshillit të Evropës, dhe deri atëherë është e rëndësishme që të ratifikohet marrëveshja, sepse në këtë formë do të largohen vërejtjet”, tha Dimitrov

Ai gjithashtu shtoi se marrëveshja është kompromis, dhe për këtë dëshmon vlerësimi i opozitës në Maqedoni dhe Greqi.

“Meqë opozita greke dhe maqedonase marrëveshjen e kanë quajtur si turp dhe kapitullim, kjo tregon se marrëveshja është kompromis”, tha Dimitrov.

Duke pasur parasysh se bëhet fjalë vetëm për shqyrtim dhe deklarim të deputetëve për marrëveshjen dhe se nga opozitarja VMRO-DPMNE nuk do të marrin pjesë në punën e komisioneve, seanca nuk do të zgjatë shumë. Paralajmërimet nga shumica parlamentare janë se marrëveshja do të ratifikohet nesër, ndërsa në fund të qershorit dhe fillim të korrikut Maqedonia pritet të fillojë negociatat për anëtarësim me BE dhe anëtarësimi i plotë në NATO.