Diskriminimi ende i theksuar në Maqedoni

Në Maqedoni ende shkelen të drejtat e njeriut dhe qytetarët ndjehen të diskriminuar, ka thënë Avokati i Popullit, Ixhet Mehmeti

Këto komente Mehmeti i bëri gjatë një konference me temën “Mekanizmi për mbrojtje nga diskriminimi në Maqedoni”, në kuadër të një projekti të ndihmuar nga BE përmes fondeve IPA.

“Diskriminimi akoma dhemb. Një dukuri që duhet me kohë të prevenohet, në rast se nuk ndodh kjo, atëherë është mirë që të mbrohen viktimat. Nga të dhënat mund të konstatojmë se shumë qytetarë janë të vetëdijshëm se të drejtat e tyre shkelen në baza të ndryshme. Ata ndjehen të përjashtuar apo diskriminuar”, theksoi Avokati i Popullit, Ixhet Mehmeti, raportojnë mediet në Shkup

Sipas tij, po rritet numri i kërkesave të qytetarëve në adresë të institucionit të tyre, si mekanizëm mbrojtës.

Mehmeti ka theksuar se në raportin vjetor që është në përgaditje e sipër nga Avokati i Popullit, ka kërkesa të qytetarëve për tu mbrojtur nga diskriminimi në bazë të ndryshme, si kombëtare, fetare, gjinore dhe politike, etj.

Në Maqedoni ekziston edhe Komision për mbrojtje nga diskriminimi. Deri tani,  për një vit nga formimi i tij janë adresuar 61 ankesa për diskriminim, kryesisht në baza nacionale dhe politike, punësime dhe sfera tjera.