Dokumentari “E dashur Shqipëri” para publikut në Tiranë

Eliza Dushku mblodhi në Tiranë shumë figura të rëndësishme shqiptare

Dokumentari “E dashur Shqipëri”, i aktores të mirënjohur me origjinë shqiptare, Eliza Dushku mblodhi në Tiranë shumë figura të rëndësishme shqiptare që po korrin sukses në botë. Fadil Berisha, Anxhela Martini, Blerim Destani, ishin ndër figurat kryesore që kaluan në tapetin e kuq, raportojnë mediat në Tiranë.

Në kuadër të Tirana Art Day, Eliza Dushku vendosi ta prezantojë filmin e saj në “Kinema Millenium”, duke qenë edhe vet e pranishme në të.

Vetë Eliza Dushku preferoi që t’ia linte dokumentarit të fliste për të.

“Dokumentari do të flasë shqip”, tha ajo, duke falënderuar të gjithë ata që e ndihmuan në këtë rrugëtim të sajin nëpër Shqipëri.

„Unë jam një shqiptaro-amerikane nga Bostoni. Gjyshërit e mi emigruan në Amerikë në vitet 1920 dhe ikën nga kjo jetë përpara se unë të lindja. Babai më ka mësuar që të ndihem krenare për gjakun tim shqiptar dhe tani erdhi koha që unë të zbuloj arsyen e kësaj pseje”, ka thënë aktorja shqiptare e Holivudit

Ajo ishte e veshur me një fustan të kuq dhe këpucë të zeza, si simbolet e flamurit shqiptar . Në tapetin e kuq ajo shoqërohej nga bashkëpunëtorët e të ngushtë si edhe nga vëllai i saj, i cili është njëkohësisht edhe regjisori i filmit të saj.