Një tjetër sukses akademik i shqiptarëve në Evropë vjen nga Gjermania, ku Doruntin Shabani nga Presheva ka mbrojtur me sukses doktoraturën në Institutin për Fizikë Bërthamore të Universitetit të Kölnit, duke fituar titullin Doktor i Fizikës Bërthamore, transmeton albinfo.ch.
Arritja e tij shënon një moment të rëndësishëm në rrugëtimin akademik dhe profesional, në një fushë të specializuar të shkencës, e cila kërkon përgatitje të avancuar, përkushtim dhe angazhim të vazhdueshëm në kërkimin shkencor.
Disertacioni dhe puna kërkimore e Shabanit janë vlerësuar me notën më të lartë nga komisioni akademik, në përbërje të të cilit ishin profesorët Christoph Langer, Dennis Mücher, Kathrin Wimmer dhe Annette Schmidt.
Përfundimi me sukses i doktoraturës në këtë institucion universitar gjerman përbën një arritje të rëndësishme në formimin e tij shkencor dhe hap një kapitull të ri në karrierën akademike e profesionale.
Suksesi i Doruntin Shabanit është një lajm i veçantë për Preshevën dhe një tjetër dëshmi e arritjeve të shqiptarëve në institucionet akademike evropiane. Rrugëtimi i tij përfaqëson një shembull të përkushtimit ndaj dijes dhe kërkimit shkencor, duke i shtuar një tjetër emër listës së shqiptarëve që po avancojnë në fusha të specializuara të shkencës.
Arritje të tilla dëshmojnë potencialin e të rinjve shqiptarë për të kontribuar në zhvillimin e dijes dhe të kërkimit shkencor në nivel ndërkombëtar./Albinfo.ch
