Drutë, burim themelor i ngrohjes në Kosovë

Sipas një studimi realizuar nga Ministra e Bujqësisë dhe FAO e Finlandës, rreth 83 për qind e zonave urbane dhe 97 për qind të zonave rurale, shfrytëzojnë drutë si lëndë djegëse

Republika e Kosovës është njëri nga shtetet më të pasura në rajon me thëngjill, por pavarësisht kësaj, shumica absolutë e kosovarëve shfrytëzojnë drurin si burimi kryesor për ngrohje. Sipas një studimi, del se 83 për qind të zonave urbane dhe 97 për qind të zonave rurale, shfrytëzojnë masën drusore si lëndë djegëse.

Sipas këtij studimi, kërkesat për këtë lëndë djegëse nga amvisëritë arrijnë në 2.05 milionë metër kub dru.

Këto rezultate janë publikuar sot me rastin e prezantimit të studimit për biomasën drusore në Kosovë, studim ky i cili është realizuar nga Ministria e Bujqësisë në bashkëpunim me kompaninë finlandeze, FAO.

Sekretari i Ministrisë së Bujqësisë, Pylltarisë dhe Zhvillimit Rural (MBPZHR), Kapllan Halimi, ka thënë se ky studim do të merret për bazë edhe nga kjo ministri gjatë hartimit të politikave për sektorin e pylltarisë , i cili sipas tij, ofron edhe një mundësi të mirë punësimi.

“Një ndër prioritetet e Ministrisë së Bujqësisë ka qenë edhe sektori pyjor, të cilin gjatë viteve të fundit e kemi përkrahur në forma të ndryshme, me qëllim që pylltarinë ta kthejmë në njërin ndër sektorët që ndikon në zhvillimin ekonomik të vendit”, ka thënë  Halimi.

Gjatë prezantimit të këtij studimi, Nike Krajnc, eksperte ndërkombëtare për biomasën drusore dhe konsulente e FAO-së, ka treguar se kjo analizë e bërë në Kosovë ka për qëllim të rrisë kontributin e sektorit pyjor në ekonominë kombëtare përmes shfrytëzimit të qëndrueshëm të burimeve pyjore, duke marrë parasysh rolin shumëdimensional të pylltarisë.

“Në bazë të rezultateve që kanë dalë nga studimi ynë del se amvisëritë janë shfrytëzuesit më të mëdhenj të drurit si lëndë djegëse, ku sipas këtij studimi del se amvisëritë rurale shfrytëzojnë 8.2 metër kub dru për djegie, ndërsa ato urbane shfrytëzojnë 6.7 metër kub dru. Krahas amvisërive, edhe shkollat janë shfrytëzues të drurit si lëndë djegëse, ku për këtë lëndë djegëse shpenzohen më shumë se 4.7 milionë euro në vit”, ka treguar ekspertja Krajnc.

Ndryshe, rezultatet e këtij studimi tregojnë se burimi kryesor i biomasës drusore janë pyjet, pastaj mbetjet nga pemishtet, vreshtat, si dhe nga mbetjet e industrisë së sharrave.

Po ashtu, sipas studimit del se edhe shkollat janë përdorues të drurit si lëndë djegëse, ku 57 për qind të tyre del se e përdorin drurin si të vetmin burim të energjisë për ngrohje, si dhe rreth 200 mijë  metër kub dru, thuhet se përdoren në objektet turistike.