Dy rajonet e pasura të Italisë duan më shumë autonomi

Dy nga rajonet më të pasura në veri të Italisë kanë votuar për më shumë autonomi, sipas liderëve të tyre.

Më shumë se 90 për qind e votuesve në Lombardi, shtëpia e Milanos, dhe regjionit Veneto rreth Venecias, kanë votuar për po në një referendum, sipas presidentëve të tyre.

Të dy liderët janë anëtarë të Ligës Veriore, që ka deklaruar qysh moti se veriu i Italisë po mban pjesën jugore të shtetit, shkruan Albinfo.

Dy regjionet së bashku llogariten sa rreth 30 për qind e pasurisë kombëtare të Italisë.

Kritikët e sondazheve i kanë quajtur këto deklarata si “mashtrim” për zgjedhjet e përgjithshme të vitit të ardhshëm, ndërsa qeveria qendrore në Romë ka thënë se sondazhet janë të panevojshme edhe pse janë të lejuara sipas kushtetutës.

Një referendum i ngjashëm u mbajt në Kataloni më 1 tetor, por aty shteti e shpalli të pavlefshëm dhe u morën masa të menjëhershme.

Roberto Maroni, lider i Lombardisë, thotë se këto dy votime dallojnë nga njëra-tjetra.

“Ne nuk jemi Kataloni. Do të mbesim pjesë e kombit italian me më shumë autonomi, ndërsa Katalonia dëshiron të bëhet shteti i 29-të i Bashkimit Evropian. Ne jo. Jo tani”, ka thënë ai për Reuters.

Ankesa kryesore e tyre mbetet se ata dërgojnë shumë më shumë taksa drejt Romës në krahasim me regjionet tjera.