Dy të burgosur arratisen nga Smrekovnica

Sipas Policisë, dy të burgosurit janë arratisur nga burgu i Smrekovnicës afër Mitrovicës. Policia ka shpallur fletarrest për ta

Dy të burgosur kosovarë të cilët po e vuanin dënimin në Burgun e Smrekovnicës afër Mitrovicës, janë arratisur nga burgu, ka njoftuar Policia e Kosovës. Sipas një njoftimi zyrtar, dy të burgosurit janë arratisur, njëri më 2 ndërsa tjetri më 8 gusht, ndërsa Policia iu është vënë pas gjurmëve të tyre.

Zëdhënësi i Policisë së Kosovës për rajonin e Mitrovicës, Besim Hoti, i ka thënë gazetës “Zëri”, se njëri prej të burgosurve është nga komuna e Gjilanit, ndërsa për të arratisurin tjetër nuk ka dhënë informacion.

“Është e vërtet se dy persona të privuar nga liria janë arratisur nga burgu i Smrekovnicës dhe janë ende në arrati, ndërkohë që policia ka fletëarrest për ta dhe është në kërkim të tyre”, tha toger Hoti, sipas të cilit, akoma nuk dihet mënyra e arratisjes së tyre.

Njëri nga të arratisurit, sipas Policisë, ka qenë në vuajtje të dënimit për grabitje, ndërkaq akuza e të arratisurit tjetër nga është konfirmuar.

Ndryshe, Burgu i Smrekovnicës për disa vite nuk ka qenë në funksion, pasi që në të kanë qenë të dislokuar trupat ndërkombëtare. Ai është një burg ndërmjet Vushtrrisë dhe Mitrovicës, ndërsa me herët është konsideruar gjysmë i lirë, për faktin se shumica e të burgosurve që janë transferuar aty, kanë qenë ata që e ka në përfunduar minimum dy të tretat e vuajtjes së dënimit.

Madje shumica e të burgosurve të Smrekovnicës, kanë shfrytëzuar vikendet për vizitë në familje.