Dy vajza të vogla qëllohen me thikë para shkollës në Francë 

Keystone EPA/CHRISTOPHE PETIT TESSON

Dy vajza të vogla u qëlluan me thikë përpara shkollës së tyre në Souffelweyersheim, një qytet i vogël pranë Strasburgut në Francë. Mediat franceze bëjnë të ditur se sulmi ndodhi pak pas orës 14:00, ndërsa policia arrestoi autorin.

Dy vajzat janë të moshës 6 dhe 11 vjeçe, mbetën të lënduara lehtë në rrugën pranë shkollës së tyre.

Sipas autoriteteve vendase, të gjithë fëmijët e shkollës fillore jashtë së cilës ndodhi ngjarja me thikë janë aktualisht në objektin e shkollës për arsye sigurie.

Nga të dhënat paraprake mësohet se sulmuesi është me probleme mendore. Sipas policisë, autori 29-vjeçar, “nuk është i njohur për autoritetet” dhe motivet e tij “duket se nuk lidhen me radikalizimin”.

Pas ngjarjes prindërit u mblodhën para shkollës për të marrë informacion mbi situatën. Një zëdhënës i prefekturës u shpjegoi të pranishmëve se situata ishte nën kontroll dhe se kërcënimi ishte shmangur.