Edhe Danimarka u bashkohet vendeve të BE-së që nuk pranojnë refugjatë

Parlamenti i vendit ka miratuar një ligj sipas të cilit Danimarka nuk detyrohet më të pranojë refugjatë

Shtetet e Evropës Qendrore, anëtare të Bashkimit Evropian, si Polonia, Hungaria dhe Çekia, prej kohësh kanë dëshmuar kursin e tyre kundër pranimit të refugjatëve. Në veçanti ato janë shprehur kundër kuotës së caktuar nga UNHCR për pranimin e azilkërkuesve. Së fundi, këtij grupi i është bashkuar edhe Danimarka.

Ajo ka përjashtuar veten nga sistemi i kuotimit i UNHCR-së dhe ka vendosur të mos strehojë më refugjatë e migrantë.

Parlamenti i vendit ka miratuar një ligj sipas të cilit Danimarka nuk detyrohet më të pranojë refugjatë. Është interesante se në votimin në favor të këtij ligji, përveç deputetëve të koalicionit të djathtë-liberalë-konservativë, kanë kontribuuar edhe ata të Partisë Socialdemokrate.

Ndërkohë, Amnesyt International e ka kritikuar ashpër veprimin e Qeverisë së Danimarkës. Ajo e ka quajtur “Dështim historik” këtë veprim.

Po ashtu, tashmë është bërë e ditur se Komisioni Evropian ka paditur Poloninë, Republikën Çeke dhe Hungarinë për shkak se nuk kanë respektuar vendimin për rialokimin e refugjatëve në kuadër të Bashkimit Evropian në bazë të kuotave nacionale.