Edhe dy kantone bëjnë presion për hapjen e shpejtë të restoranteve

Kantoni i St. Gallenit dëshiron lehtësime më t mëdha se qeveria federale kur bëhet fjalë për zbutjen e masave ndaj koronavirusit

Pas kantoneve: Vaud, Graubünden dhe Appenzell-Innerhoden edhe dy kantone bëjnë presion për zbutjen e masave më herët se që planifikon qeveria e vendit. Fjala është për Kantonin e St. Gallenit dhe për atë të Appenzell-Ausserhoden, të dy në lindje të Zvicrës, shkruan albinfo.ch.

Kantoni i St. Gallenit, duke komentuar masat lehtësuese të propozuara nga Këshilli Federal i ka përshkruar ato si “të përshtatshme dhe të justifikueshme”. Por megjithatë, qeveria kantonale thotë se këto masa janë të pamjaftueshme. Sipas komunikatës, për shkak të situatës epidemiologjike të përmirësuar ndjeshëm duhen zbatuar lehtësime të mëtejshme.

Kantoni propozon këto ndryshime:

Hapjen e përgjithshme të ambienteve të jashtme të restoranteve, përfshirë zonat e skive.

Numri maksimal i njerëzve në aktivitete private duhet të rritet nga 5 në 10 persona, duke filluar nga sot.

Në ngjarjet kulturore dhe sportet në natyrë duhet të lejohen deri në 15 persona.

Kufiri i moshës për sportet dhe kulturën duhet të përcaktohet në 25 vjet në vend të 18 sa planifikon qeveria federale.

Hapje të  zonave të brendshme të kopshteve zoologjike dhe parqeve të kafshëve – analoge me muzetë.

Ulje të detyrimit të punës nga shtëpia në bazë të një rekomandimi.

Masa të ngjashme propozon edhe kantoni Appenzell Ausserhoden, transmeton albinfo.ch. Ndër të tjera, ky kanton i vogël malor në Zvicrën lindore kërkon që zonat e jashtme të restoranteve të jenë në gjendje të shërbejnë mysafirët nga 1 marsi 2021 (me përjashtim të bareve dhe klubeve).
Përveç kësaj, kantoni në fjalë kërkon hapje të plotë të restoranteve nga 1 prilli 2021.

---