Edhe një javë afat për ofertat në PTK

Qeveria e Kosovës e ka shtyrë edhe një javë aftin tenderues për privatizimin e dy të tretave të PTK-së. Kjo e fundit është kompania më profitabile në Kosovë

Komisioni Qeveritar për Privatizimin e Postës dhe Telekomit të Kosovës (PTT) ka marrë vendimin që të shtyjë për një javë datën e dorëzimit të ofertave për privatizimin e 75 për qind të aksioneve të PTK-së.

Sipas Ministrisë së Zhvillimit Ekonomik, shtyrja ka ardhur si rezultat i kërkesës së investitorëve për kompletimin e dokumenteve të tyre.

“Duke pas parasysh vëllimin e madh të dokumenteve të nevojshme për një proces të tillë kompleks të privatizimit si dhe për shkak të sqarimeve teknike të dhëna gjatë javës së kaluar nga autoriteti kontraktues, pas kërkesave të kompanive pjesëmarrëse në proces në lidhje me dokumentet tenderuese, është vendosë që afati të shtyhet për një javë”, sqaron MZHE.

Me këtë vendim, Komisioni Qeveritar për Privatizimin e PTK-së, sipas MZHE-së, favorizon konkurrencën e cila është vendimtare për suksesin e procesit të privatizimit, siguron respektimin e plotë të gjitha dokumenteve të tenderit dhe që procesi i privatizimit të përfundoj në mënyrë të rregullt.

“Data e re për pranimin e ofertave të PTK-së është caktuar të jetë 21 Marsi 2013 Ky vendim i KQP-së është marrë me rekomandimin e këshilltarëve ligjor të transaksionit dhe atyre strategjik të angazhuar në procesin e privatizimit të PTK-së”, thuhet në njoftim.

Ndryshe, kjo është hera e tretë që Komisioni Qeveritar për Privatizimin e Postës dhe Telekomit të Kosovës (PTT) e shtynë afatin e tenderimit. Herën e kaluar ku ndodhi pasi që Kosova u bë anëtare e Bankës Evropiane për Rindërtim dhe Zhvillim, dhe kjo u pa si masë lehtësuese për privatizimin e PTK-së.