Edhe Rumania t’i bashkohet zonës Schengen

Rumania iu bashkua Bashkimit Evropian së bashku me Bullgarinë në vitin 2007, por të dyja u vendosën nën një mekanizëm monitorimi për hyrjen e tyre në Schengen

Presidenti i Komisionit Evropian, Jean-Claude Juncker shprehu dëshirën e tij që Rumania t’i bashkohej zonës Schengen vitin e ardhshëm, por theksoi se Bukureshti duhet të trajtonte së pari çështjet që lidheshin me korrupsionin dhe sundimin e ligjit.

Rumania iu bashkua Bashkimit Evropian së bashku me Bullgarinë në vitin 2007, por të dyja u vendosën nën një mekanizëm monitorimi për hyrjen e tyre në Schengen.

Pas progresit të konsiderueshëm në këtë fushë, komisioni ka paralajmëruar se reformat e fundit gjyqësore dhe ndryshimet në Kodin Penal në Rumani mund të përfaqësonin një hap pas.

Ndër të tjera, Bukureshti po kërkon të ulë moshën e pensionit për gjyqtarët dhe prokurorët, transmeton “ATSH”.

Juncker tha se ai do të dëshironte që Rumania t’i bashkohej Schengenit para përfundimit të mandatit të komisionit, i cili zgjat deri në fund të tetorit 2019, përcjell albinfo.ch.

Juncker i bëri thirrje Rumanisë të gjejë një konsensus kombëtar mbi çështjet e sundimit të ligjit dhe luftën kundër korrupsionit përpara janarit, kur vendi merr presidencën gjashtëmujore të radhës të BE-së.

“Kjo është absolutisht e nevojshme”, tha Juncker.

---