Eksperti austriak krahason Kosovën me Wuhanin

Keystone

Franz Allerberger, udhëheqës i Departamentit për Mjekësi Humane brenda Agjencisë austriake për Siguri të Ushqimit (AGES), vlerëson se shkalla e të infektuarve me koronavirus në shtetet si Kosova dhe Bullgaria shkon në rreth 50 për qind.

Ai nuk u beson shifrave zyrtare të shteteve të Ballkanit, pasi që shifrat reale janë “rreth dhjetëfish më të larta”, ka thënë për të përjavshmen austriake “Profil”, përcjell albinfo.ch.

Sipas analizave të AGES-it, numri i të infektuarve në Austri lidhet në masë të konsiderueshme me ata që vijnë nga shtetet e Ballkanit ose Turqia, raportojnë mediat austriake, përcjell albinfo.ch.

Allerberger ka krahasur Kosovën dhe vendet e Ballkanit me Wuhanin dhe Ischglit, pasi sipas tij, pas bërjes së testeve serologjike, këto dy vende kishin shkallën e infektimit 43 për qind.

Sipas shifrave të “Complexity Science Hub” (CSH) në Vjenë, Bullgaria deri më tani ka regjistruar rreth 10.400 të infektuar, Rumania 45.000, Serbia 23.700, Mali i Zi 2.800, Shqipëria 4.800, Maqedonia e Veriut 10.000, Bosnja 10.000 dhe Kosova 7.100.

Kosova dje ka shënuar edhe rekord të ri të rasteve, gjithsej 273 nga 404 testime të kryera brenda 24 orëve.

Shkaku i sezonit të pushimeve, Qeveria në Austri ka lëshuar paralajmërime për shtetet e Ballkanit.