“Pa(k) fytyrë” mban titullin ekspozita e fotografive të Rromir Imamit, artistit i cili ndjek perfeksionin në mjeshtërinë e fotografisë duke e sjellë atë në nivelin e arteve “klasike” pamore sikur piktura dhe të tjerat.
Kjo ekspozitë është hapur të enjten që shkoi në ambientet e qendrës së njohur kulturore Progr në Bernë. Kurator i ekspozitës është shkrimtari dhe esteti i shquar Agron Tufa, i cili me këtë rast ka bërë edhe tekstin e katalogut dhe ka mbajtur fjalën hyrëse të ekspozitës.
Mbrëmjen e ka shpallur të hapur si dhe e ka drejtuar në gjuhën shqipe dhe angleze Blerta Morina ndërsa një fjalë rasti në gjermanishte e ka mbajtur Claudia Selin Pfaf.
Për të shkoqitur kuptimin e titullit të pazakontë të ekspozitës “Pa(k) fytyrë” (Faceless) kuratori Tufa u është referuar elementëve dallues të fotografisë së Imamit që mbështetet pothuajse vetëm në portrete, pra, në fytyra njerëzish.
“Në fotografitë e Rromir Imamit, portreti nuk ndalet aty ku mbaron fytyra. Ai vazhdon në trup, në gjest, në hije, në dritë, në sipërfaqe, në një gjurmë. Ndonjëherë ajo që nuk shohim bëhet po aq e pranishme sa ajo që shohim…”.
“Kjo është një ekspozitë ku mungesa nuk është zbrazëti. Ajo bëhet një mënyrë tjetër për të qenë i pranishëm. Kur fytyra nuk na jep më përgjigjen e parë, trupi, gjesti, drita, hija apo një formë e papritur marrin përsipër të mbajnë diçka nga prania e njeriut. Ndoshta pikërisht këtu fillon portreti…”, thotë veç tjerash Agron Tufa në laudation e tij të ekspozitës.
Duke folur për albinfo.ch, Tufa më tutje ka vlerësuar fotografinë e Imamit si një paraqitje unike në këtë art, ndër ne. Ajo nuk ndalon te fiksimi i thjeshtë i objektit të marrë në fokus të fotoparatit por thellohet në figurën, portretin e duke shpalosur nënshtresat dhe depërtuar deri në shpirtin e tij. Fotografia e Rromir Imamit është e studiuar deri në hollësitë më të imëta para se të shkrepet, dhe kështu, e shkrepur dhe e kornizuar tashmë ajo është një vepër arti, një pikturë e vërtetë.
Një fjalë rasti në vernisazhin e ekspozitës e ka mbajtur edhe Sh. T. Mentor Latifi, ambasador i Republikës së Kosovës në Zvicër. Ai ka përgëzuar autorin e ekspozitës dhe organizatorët për këtë eveniment që pasuron jetën kulturore jo vetëm të komunitetit të këtushëm shqiptar por edhe të qytetit të Bernës.
Ambasadori më tej ka vlerësuar lart punën e Rromir Imamit duke theksuar se ai ka dëshmuar se fotografia nuk është thjesht një shkrepje e fotoaparatit por një art i mirëfilltë, kur punohet me përkushtim dhe talent, sikur në këtë rast.
Rromir Imami është një fotograf profesionist shqiptar i suksesshëm, i specializuar me portretin dhe specialist i komunikimit digjital. Jeton dhe krijon në Friburg dhe Bernë.
Krahas punës në studio ai mban punëtori (workshops) të specializuara për studentët e artit (siç është ajo në Universitetin e Tetovës me titull “Një dritë, shumë dritëshkrime”) por edhe në Zvicër, ku jeton.
Veç fotografisë, Rromir Imami ka një karrierë të pasur edhe në fushën e medias dhe komunikimit.
Ekspozita, e hapur më 8 tetor mund të vizitohet deri të dielën (nesër) më 11 tetor.
Në ambientin ku po qëndron ekspozita, sot, më 10 tetor mbahet një takim letrar me Agron Tufën. Në këtë event autori do të lexojë pjesë nga krijimtaria e vet e viteve të fundit, ndërthurur me një dialog me fotografin Rromir Imami rreth konceptit ‘Pa(k) fytyrë’ të ekspozitës.
Po ashtu nesër, më 11 tetor po këtu mbahet edhe mbyllja (finisazhi) e ekspozitës Facesless të Rromir Imamit.
Photo: Anastasiia Khvorova
Adresa e takimit:
KulturPunkt im PROGR
Speichergasse 4
