Erdogan kërcënon kurdët

Presidenti i Turqisë ka kërcënuar kurdët e Irakut, se do të përballen me uri, për shkak të referendumit për Pavarësi që e kanë mbajtur.

“Kur ne të fillojmë me sanksionet tona, ata do të zhyten në uri. Gjithçka do të marrë fund kur ne të mbyllim rubinetat e naftës. Paratë do të zhduken dhe ata nuk do të munden as të gjejnë ushqim, kur kamionët të ndalen në Irakun verior”, është shprehur Erdogan, shkruajnë mediat shqiptare.

Më herët presidenti turk kishte kërcënuar se do të ndërpriste një naftësjellës të rëndësishëm për kurdët dhe do të ndalonte kamionët që kalojnë kufirin turk, përcjell albinfo.ch.

Turqia druan se, një shtet i pavarur kurd në kufirin e saj mund të ndezë ndjenjat separatiste edhe mes minoritetit të saj kurd.

Udhëheqësit kurdë thanë se referendumi nuk do të çojë automatikisht në shpalljen e pavarësisë, por do t’u japë atyre një mandat për të nisur negociatat për ndarjen nga qeveria qendrore e Bagdadit.

Por, kryeministri irakian, Haider al-Abadi ka hedhur poshtë mundësinë e bisedimeve të tilla.