Escobar i prerë: Procesi për Asociacionin duhet të fillojë tani

I dërguari i SHBA-së për Ballkanin Perëndimor, Gabriel Escobar, në një intervistë për “Pavlovic Today”, ka thënë se sivjet Kosova ka humbur përkrahjen për njohje, NATO e integrim në BE dhe ka shprehur shpresë se këto procese mund të ndodhin në vitin 2024, përcjell albinfo.ch.

“Ajo që po them është ajo që keni nuk janë pasoja, por mundësi të humbura. Kështu që pas Ohrit, unë kisha diskutuar me qeverinë e Kosovës, SHBA-në të nisin një fushatë të re njohjeje për të bindur vendet se Kosova kishte bërë gjithçka që ishte e nevojshme sipas marrëveshjes së Ohrit. Fatkeqësisht, për shkak se ne nuk kemi pasur ndonjë zbatim në Ohër, e gjithë kjo tani është jashtë tryezës. Unë do të doja, do të shpresoja që ne të mund ta bënim këtë më 2024”, ka thënë Escobar.

Diplomati amerikan ka folur edhe për Asociacionin e komunave me shumicë serbe, për të cilin ka thënë se është një proces, i cili duhet të fillojë tani, derisa ka dërguar mesazh për kryeministrin Kurti që të mos humbë kohë me këtë temë.

“Shikoni planin që propozoi Bashkimi Evropian, i cili mendoj se është shumë i drejtë. Të dyja palët duhet të fillojnë menjëherë zbatimin e kërkesave të tyre. Unë e di që në disa raste, Serbia dëshiron që Kosova të themelojë Asociacionin para se të ndërmarrë veprime nga ana e saj, dhe e di që Kosova ka propozuar që Serbia të përfundojë të gjitha pjesët e saj para zbatimit të Asociacionit. Por, Asociacioni do të jetë një proces. Kështu që unë mendoj se ne duhet të fillojmë atë proces. Njohja e licencave të Kosovës, letërnjoftimet, dokumentet qeveritare, të gjitha këto janë pjesë e saj. Dhe duke trajtuar çështjen e strukturave paralele në kuadër të Asociacionit, mendoj se edhe ky është një proces. Kështu që unë besoj se ky proces duhet të fillojë tani. Ne ende presim që qeveria e Kosovës të tregojë se është duke ecur përpara në Asociacione”, ka theksuar Escobar.