Escobar: Vendi prej një milion e gjysmë banorë do ta bindë komunitetin 700-milionësh të ndryshojë taktikat

Foto Twitter

I dërguari i Shteteve të Bashkuara të Amerikës për Ballkanin Perëndimor, Gabriel Escobar, ka shprehur mbështetjen e tij për emisarin e Bashkimit Evropian për dialogun, Miroslav Lajçak.

“Të gjitha vendet e BE-së bënë një deklaratë të përbashkët pas dështimit të bisedimeve, me mbështetje për Lajçakun. Është diçka me të cilën duhet të përballen. Lajçaku nuk do të largohet. Dialogu nuk do të largohet” – ka deklaruar Escobar në një intervistë për Zërin e Amerikës.

Tutje shton se një vend me një milion e gjysmë banorë nuk e bindë dot komunitetin transatlantik prej 700 milionësh që të ndryshojë taktikat e tij.

“Mendoj se duhet të ketë një përqasje më pragmatike nga qeveria e Kosovës. Më duhet të them edhe diçka tjetër. Gjatë javës së fundit jam alarmuar nga sulmet personale ndaj Lajçakut që ekzistojnë në sferën shoqërore të Kosovës” shtoi ai, përcjell albinfo.ch.

Escobar tha se i ka kërkuar presidentes Osmani dhe kryeministrit Kurti që t’i dënojnë këto sulme.

“Nuk po them se vijnë nga qeveria e Kosovës, por qeveria e Kosovës duhet të jetë shumë e qartë se sulmet personale ndaj përfaqësuesit të posaçëm janë të papranueshme” tha tutje Escobar për Zërin e Amerikës.

Emisari amerikan thotë se ardhur koha për qasje të re në dialog.

“Ka ardhur koha për një përqasje të re për disa nga personat që e kanë marrë dialogun si një opsion vetëm “po apo jo”. Dhe e kam fjalën konkretisht për qeverinë e Kosovës. Ata kanë një detyrim të qartë për çfarë duhet të bëjnë. Dhe mendoj se deklarata e Borrellit ishte shumë e qartë” – tha Escobar në intervistëm përcjell albinfo.ch.