EULEX-i arreston Sami Hamitin

Sami Hamitin është kryesues i Kuvendit Komunal të Prishtinës dhe njëri nga anëtarët më me ndikim të Lidhjes Demokratike të Kosovës (LDK)

Hetuesit e Misionit të BE-së për Sundim të Ligjit (EULEX) kanë arrestuar të mërkurën në Prishtinë, Sami Hamitin, kryesuesin e Kuvendit Komunal të Prishtinës dhe njëri nga anëtarët më me ndikim të Lidhjes Demokratike të Kosovës (LDK), partisë më të madhe opozitare.

Sipas një kumtese lëshuar nga EULEX-i, së bashku me Hamitin janë arrestuar edhe dy zyrtarë të tjerë, nën dyshimin për zhvatje dhe për vepra të tjera lidhur me korrupsion.

“Gjatë këtij operacioni, policia e EULEX-it i ka bastisur disa shtëpi, lokale afariste dhe zyra të komunës. Arrestimet janë bërë me urdhër të prokurorit të EULEX-it, ndërsa bastisjet janë autorizuar nga gjyqtari i procedurës paraprake”, thuhet në njoftim.

Tomë Gashi është avokat i Sami Hamitit. Ai ka thënë për mediat në Prishtinë, se klienti i tij do të merret në pyetje për një aferë të mundshme korrupsioni. “Prokuroria e EULEX-it i ka hapur hetimet. Sot ata kanë kërkuar që ai të merret në pyetje dhe kjo do të ndodh pasdite”, tha avokati Gashi.

Sami Hamiti është djali i vëllait të Sabri Hamitit, nënkryetarit të LDK-së. Ai që nga paslufta ka ushtruar pozita të larta në Komunën e Prishtinës. Menjëherë pas luftës ka qenë shef i Departamentit për Gjeodezi dhe Kadastër për t’u emëruar në nomenklaturën  e dytë si shef i ekzekutivit në komunë.

Ai po ashtu edhe në përbërjen e tretë dhe të katërt të komunës, ka qenë ndër njerëzit kyç, madje në opinion është cilësuar si krahu i fortë i LDK-së”.