Eurodeputeti austriak: Lidershipi i Serbisë po sillet në mënyrë agresive, duke mos e pranuar të kaluarën

Eurodeputeti austriak, Lukas Mandl, ka akuzuar lidershipin në Serbi se po sillen në mënyrë agresive në rajonin e Ballkanit Perëndimor, duke mos e pranuar të kaluarën. Mandl theksoi se Serbia mund të jetë motor i ekonomisë në rajon dhe të kontribuojë për tërë rajonin, mirëpo udhëheqja institucionale atje nuk po e bën një gjë të tillë.

Në konferencën e Federatës së Paqes Universale, ku po diskutohet për “Paqen, stabiliteti dhe tranzicioni demografik në Ballkanin Perëndimor”, politikani austriak tha se përparimi i rajonit bëhet vetëm përmes bashkëpunimit dhe jo konfliktit, transmeton albinfo.ch.

“Serbia mund të jetë sikurse Gjermania në Ballkanin Perëndimor, si një motor i ekonomisë. Serbia mund të kontribuojë në përparimin e njerëzve të vendit të vet dhe më pastaj të rajonit. Shumë njerëz në Serbi e bëjnë këtë, por lidershipi i Serbisë nuk po e bën një gjë të tillë. Ata po sillen në mënyrë agresive, duke mos e pranuar të kaluarën”, tha ai, raporton KP.

Mandl e konsideroi të domosdoshme realizimin e reformave më gjashtë vendet e Ballkanit Perëndimor si parakusht për investime strategjike dhe integrime evropiane.

“(Në rajon) Bashkëpunimi me shumë se konfrontimi, bashkëpunimi më shumë sesa konflikti. Ky duhet të jetë qëllimi kryesor në Ballkanin Perëndimor… Investimet janë të nevojshme, sa më pak burokraci, më shumë mundësi dhe sundim të ligjit. E di se gjasat do të jenë më të mëdha për investime që të bëhen në Kosovë dhe rajon. Sistemi arsimor, shëndetësor janë kushte për zhvillim të duhur. Reformat janë të nevojshme për të gjitha shtetet e Ballkanit Perëndimor”, u shpreh tutje ai.