FIBA e pranon Kosovën, thyhet heshtja 15 vjeçare

Sipas njoftimit zyrtar, Federata e Basketbollit e Kosovës (FBK) është bërë anëtarja e 215 e FIBA-s dhe e 52-ta e FIBA-Europa

Federata Ndërkombëtare e Basketbollit (FIBA) ka pranuar zyrtarisht Kosovën pjesë e saj, duke thyer kështu heshtjen 15 vjeçare në basketboll. Sipas njoftimit zyrtar, Federata e Basketbollit e Kosovës (FBK) është bërë anëtarja e 215 e BIBA-s dhe e 52-ta e FIBA Europa. Ky lajm është pritur si sihariq i këtij viti.

Vendimi është marrë në mbledhjen e komitetet ekzekutiv të FIBA-s si rezultat i pranimit të Komitetit Olimpik të Kosovës në KON (Komitetin Olimpik Ndërkombëtarë) në dhjetor të vitit 2014. Siç raportojnë mediet në Kosovë, pas këtij pranimi pason automatikisht edhe në FIBA Evropa.

Lajmi është konfirmuar edhe nga kryetari i FBK-së, Erolld Belegu, i cili ka uruar të gjithë përmes një postimi në Facebook. “13 mars 2015, Kosova bëhet anëtare e 215 e FIBA-s dhe anëtare e 52 e FIBA Europe. E premte me fat. Urime Kosovë”, shkruan Belegu në rrjetin e tij.

Ky lajm ka gëzuar përfaqësuesit e institucioneve të Kosovës, të cilët e konsiderojnë si lajmin më të mirë.

Presidentja e Kosovës, Atifete Jahjaga ka përgëzuar FBK-në për pranimin në FIBA. “Alley-oop për Kosovën! Urime anëtarësimin në FIBA”, ka shkruar presidentja Jahjaga.
Ndërsa kryetari i Prishtinës, Shpend Ahmeti thotë se tani është koha që Pallati i Rinisë ta kalojë në pronësi të Komunës së Prishtinës dhe komunave tjera që kanë kontribuar në ndërtimin e këtij institucioni publik.

Pranimi i Kosovës në FIBA ka irrituar federatën serbë të basketbollit. Presidenti i Federatës së Basketbollit të Serbisë, Dejan Tomasevic ka shpresuar se FIBA nuk do të pranojë Kosovën të anëtarësohet e plotë. Sipas tij, kjo është krejtësisht vendim i padrejtë.