FIFA: Shqipëria ngjitet dy vende më lart

Shqipëria është ngjitur dy vende më lart në renditjen e fundit të FIFA-s, të publikuar këtë të enjte. Shqipëria figuron në vendin e 61-të në botë, me 557 pikë, nga 548 që ka pasur një muaj më parë.

Në renditjen e fundit rikthehet Italia në mesin e 10 ekipeve më të mira, por mungon ndër to Spanja. Në renditjen e muajit shkurt Italia gjendej në vendin e 12-të, pas Spanjës dhe Zvicrës, ndërsa tashmë për herë të parë që prej qershorit 2014 ka kapur vendin e 10-të.

Gjermania vazhdon të mbajë vendin e parë, e ndjekur nga Argjentina dhe Kolumbia. Më pas vijnë Belgjika, Holanda, Brazili, Portugalia, Franca dhe Uruguaji.

Renditja e ardhshme e FIFA-s do të publikohet më 9 prill, një renditje që do të ketë përfshirë edhe rezultatet e ndeshjeve eliminatore të këtij fundmuaji, ku vlen të përmendet se Shqipëria do të presë Armeninë në “Elbasan Arena”, më 29 mars.