Filloi fushata zgjedhore

Në mesnatë ka filluar fushat zgjedhore në Kosovë. 18 parti politike, 7 iniciativa qytetare, 4 koalicione do të garojnë për të siguruar sa më shumë vende në Kuvendin e Kosovës

Në Kosovë zyrtarisht ka filluar fushata elektorale për zgjedhjet parlamentare të 8 qershorit, ndërsa 18 parti politike, 7 iniciativa qytetare, 4 koalicione dhe 1 kandidat i pavarur i kanë hyrë garës për të siguruar vende në Kuvendin e Kosovës. Fushata kësaj radhe zgjatë vetëm 10 ditë.   

Zgjedhjet e parakohshme pasojnë shpërndarjen e Kuvendit më 7 maj. Ky hap ka ardhur pas dështimit të institucionit ligjvënës që të themelojë Forcat e Armatosura të Kosovës.

Edhe pse jo zyrtarisht fushat ka nisur më herët, partitë politike kanë 10 ditë në dispozicion për t’i shpalosë programet e tyre. Në zgjedhjet e kaluar fushata parazgjedhore ka qenë 30 ditë, por pasi që këto konsiderohen zgjedhje të jashtëzakonshme, atëherë fushata është shkurtuar në 10 ditë. 

Partia Demokratike e Kosovës e nisi fushatën një minutë pasi orës 12 të mesnatës. Me fishekzjarrë në degën e kësaj partie në Prishtinë, ishin nënkryetari i PDK-së, Kadri Veseli, dhe kryetari i kësaj dege Lirak Qelaj, të cilët me një besim të plotë në fitore hapën këtë fushatë.

Edhe kryetari i Lidhjes Demokratike të Kosovës (LDK), Isa Mustafa, një minutë pas mesnate e ka shpallur të mërkurën fushatën për fitore në zgjedhjet nacionale të 8 qershorit, duke garantuar qytetarët se do të respektohen të gjitha procedurat ligjore që vullneti i sovranit të dëgjohet dhe të respektohet.

Ndryshe, me qëllim që të hiqen të gjitha dilemat se votat mund të kontrabandohen, Komisioni Qendror Zgjedhor po e shqyrton mundësinë që numërimi i votave të bëhet dy herë në Qendrën e Numërimit dhe të Rezultateve (QNR) në Prishtinë.