Filmi kosovar shpërblehet në festivalin “Sundance”në SHBA

Filmi kosovar i regjisores Blerta Zeqiri, i cili u përzgjodh për të marrë pjesë në Festivalin e Filmit “Sundance”, është shpërblyer me çmimin Jury Prize in Short Film, International Fiction.

Filmi “The Return” (Kthimi), i regjisores Blerta Zeqiri, i shkruar nga Shefqet Gjocaj, flet për kthimin në shtëpi të një burri nga një burg serb, ardhje e cila komplikohet me betejën e tij për të vazhduar jetën aty ku e ka lënë me bashkëshorten dhe të birin e tij.

“Ne erdhëm në Kosovë, dhe siç e dini, jemi një vend i shkatërruar nga lufta. Jemi shteti më i ri në botë dhe sonte u bëmë shtet vërtet i pavarur dhe i pambikëqyrur, andaj ky çmim ka shumë rëndësi”, theksoi Gjocaj, i cili po qëndronte pranë regjisores.

Filmi i Blerta Zeqirit, i prodhuar nga “Prishtina Film”, është filmi i parë kosovar, por edhe shqiptar, që merr pjesë në programin zyrtar të festivalit më të madh të filmit të pavarur në SHBA, “Sundance”.

Por, kjo nuk është hera e parë që Zeqiri paraqitet në skenat botërore të filmit, pasi që filmat e saj kanë marrë pjesë në mbi 40 festivale ndërkombëtare të filmit, ku edhe janë shpërblyer shumë herë. /albinfo&zëri/