Finlandë: Fluks i emigrantëve para rimbylljes së dy pikave kufitare me Rusinë

Pixabay: Ilustrim

Disa orë përpara rimbylljes së dy pikave të kalimit jugor në kufirin me Rusinë, dhjetëra emigrantë kaluan në Finlandë, pasi vendkalimet Vaalimaa dhe Niirala ishin rihapur shkurtimisht të enjten, shkruan AP.

Mbyllja erdhi pasi Finlanda fajësoi Rusinë për dërgimin e emigrantëve në kufi në një përpjekje për të destabilizuar vendin, i cili u bashkua me NATO-n vetëm para disa muajve.

Mbrëmjen e së enjtes, “Roja Kufitare Finlandeze” kishte raportuar se dhjetëra emigrantë pa dokumentacion apo viza të duhura kishin mbërritur në dy pikat e kontrollit, megjithatë qeveria finlandeze vendosi të njëjtën ditë t’i mbyllë ato përsëri, përcjell albinfo.ch.

Pikat kufitare do të qëndrojnë të mbyllura deri më 14 janar, ndërsa sipas qeverisë finlandeze, rihapja e shkurtër kishte për qëllim si një provë për të parë nëse “fenomeni” i emigrantëve ekziston ende në kufi.