Fixhi njeh Republikën e Kosovës

Këtë njohje konfirmoi vetë kryeministri Hashim Thaçi në mbledhjen e rregullt të Qeverisë së Kosovës

Republikën e Kosovës e ka njohur edhe shteti i Fixhit, duke u bëri shteti i 96 që njeh realitetin e ri në Evropë. Këtë njohje konfirmoi vetë kryeministri i Kosovës, Hashim Thaçi në mbledhjen e rregullt të Qeverisë së Kosovës.

Pa i dhënë shumë pompozitet kësaj njohje Thaçi shkurt tha se “Fixhi na ka njohur”, ndërsa e falënderoi qeverinë e këtij shteti për këtë veprim. Kryeministri kosovar po ashtu premtoi edhe për njohje të reja gjatë ditëve në vijim.

“Kosova do të përjetojë një valë njohjesh. Ky është sukses i klasës politike kosovare”, tha Thaçi.

Republika e Ishujve Fixhi është një shtet ishullor në Oqeani, i cili përbëhet prej një mori ishujsh në Jug të Oqeanit Paqëso. Ka 322 ishuj, prej tyre vetëm 106 janë të banuar. Ka rreth 1 milionë banorë, ndërsa kryeqyteti i Fixhit është Suva.