Flet babai i Diamantit të vrarë

Ai u ka treguar sot para qendrës tregtare gazetarëve fotografinë e të birit të vdekur. “Ky ishte im bir”, ka thënë Naimi. “Shoku i tij ia doli të ikte por Diamanti vdiq”.

Keystone

Shumica e të vrarëve në atentatin e bërë mbrëmjen e të premtes në Munih janë të huaj të moshës së re dhe fëmijë. Mediat gjermane shkruajnë gjerësisht për identitetin e të vrarëve dhe nënvizojnë se në mesin e 9 viktimave janë dy vajza dhe një djalë, shqiptarë me prejardhje nga Kosova.

Gazeta gjermane Tages Zeitung shkruan se i pari që ka identifikuar rastin e të vrarit në familje ka qenë Naim Zabërgja, i cili ka humbur të birin, Diamantin 20 vjeçar. Ai u ka treguar sot para qendrës tregtare gazetarëve fotografinë e të birit të vdekur.

“Ky ishte im bir”, ka thënë Naimi. “Shoku i tij ia doli të ikte por Diamanti vdiq”, transmeton albinfo.ch.

Naimi ka dy vajza ndërsa Diamanti ishte djali i tij i vetëm. Ai ishte duke bërë një kualifikim për punë në aeroport. Se Diamanti tash nuk është më ndër të gjallët, Naimi ka vështirësi ta kuptojë.

Për Diamantun tashmë është hapur një faqe në facebook.

Ndërsa familjarët e vajzës shqiptare Armelës 14 vjeçare, që ka humbur jetën po ashtu në këtë atentat kanë hapur një xhirollogari në të cilën  kërkojnë nga njerëzit vullnetmirë që të ndihmojnë me para për transportimin e kufomës në Kosovë.