Franshiza e sigurimit shëndetësor, nga 300 rritet në 350 franga

Rritja nga 300 në 350 franga do të ndodhë qysh në vitin e ardhshëm. Pas dhjetë vitesh mendohet se franshiza minimale do të rritet në 450 franga në vit

Pas Dhomës Nacionale tash edhe Dhoma e Kantoneve ka vendosur për rritjen e franshizës së sigurimit shëndetësor. Ajo, shumë shpejt do të ngrihet nga 300 franga sa është tash, në 350 franga.

Dhoma e Kantoneve me shumicë votash, 26 me 13, ka vendosur që në të ardhmen franshiza te fondet e sigurimeve shëndetësore të përshtatet në mënyrë automatike me ndryshimet që do të ndodhin në lëmin shëndetësor, shkruan sda.ch.

Kështu, është paraparë që  franshiza e cila sot kushton 300 franga, të shtrenjtohet në çdo katër vite nga 50 franga, transmeton albinfo.ch. Kjo duhet të ndodhë nëse kostoja mesatare bruto e shpenzimeve për një person të siguruar kalon mbi 13 fish bazën e franshizës së rregullt. Ka mundësi që të rritet po ashtu edhe franshiza e zgjedhur në mënyrë fakultative.

Rritja nga 300 në 350 franga pritet të ndodhë qysh në vitin e ardhshëm, gjegjësisht në momentin e hyrjes në fuqi. Pas dhjetë vitesh mendohet se franshiza minimale do të rritet në 450 franga në vit. Ndërkaq, franshizat për fëmijë nuk i nënshtrohen këtij rregullimi.

Sipas shumicës së deputetëve të Dhomës së Kantoneve, kjo rritje “e moderuar” e çmimit çon në rritjen e përgjegjësisë personale. Ajo zvogëlon numrin e vizitave më pak të nevojshme te mjeku dhe kështu mundëson kosto më të ulët të shëndetësisë.

Por kështu nuk mendon Partia Socialdemokrate (SP). Ajo kundërshton këtë rritje “josociale” të franshizës. Sipas saj, gjithnjë më shumë njerëz heqin dorë nga shërbimet mjekësore pasi që nuk kanë mundësi t`i paguajnë ato, transmeton albinfo.ch. Për këtë arsye, SP ka paralajmëruar mbajtjen e një referendumi për këtë çështje. Prandaj, fjalën e fundit do ta thotë populli. Organizata për mbrojtjen e konsumatorit është në mbështetje të SP-së për referendumin në fjalë.

---