“Freedom House” lavdëron qeverisjen e Shpend Ahmetit

Kryetari i Prishtinës, Shpend Ahmet dhe komuna që drejton, është vlerësuar pozitivisht në raportin e fundit të Organizatës “Freedom House”

Qeverisja në Komunën e Prishtinës dhe puna e kryetarit Shpend Ahmet është vlerësuar pozitivisht në raportin e fundit të Organizatës për të drejta të njeriut, demokraci dhe liri politike “Freedom House”. Sipas FH, edhe përkundër pengesave nga Qeveria e Kosovës, me të cilat ballafaqohet Komuna e Prishtinës, prapë komauna ka qenë efikase.

Kështu njofton Zyra për informim e kësaj komune, sipas të cilës, në raportin e FH,  thuhet se përplasjet ndërmjet pushtetit qendror dhe atij lokal janë shfaqur në lidhje me të drejtën që komunat të themelojnë ndërmarrje publike.

“Iniciativa e Komunës së Prishtinës që të themelojë ndërmarrjen publike për menaxhimin e parkingjeve është ndaluar nga Ministria e Administratës dhe e Pushtetit Lokal, për shkak të paqartësive në dispozita ligjore. Kontesti mund të jetë për shkak të fërkimeve politike, sepse Vetëvendosje qeverisë me Komunën e Prishtinës, por është në opozitë në Kuvendin Komunal”, thuhet në njoftimin e komunës, citon Koha.

Në raport më tutje thuhet se një hulumtim gjithëpërfshirës i institutit GAP, tregon se kryetarët e tanishëm të komunave demonstrojnë një transparence të përmirësuar të qeverisjeve lokale edhe pse rezultatet dallojnë nga komuna në komunë.

Kryetari i Komunës së Prishtinës, Shpend Ahmeti ka marrë lëvdata të veçanta për transparencë dhe masa kundër korrupsionit në nivelin lokal.

Edhe pse neni 13 i Kushtetutës parasheh status të veçantë për Prishtinën si kryeqytet i Kosovës, korniza ligjore mbetet e bllokuar dhe Prishtina vazhdon të ketë tretman të njëjtë si komuna të tjera, thuhet në raport. Ndryshe, Kuvendi Komunal i Prishtinës dominohet nga këshilltarët LDK-PDK, të cilët po e sfidojnë përditë kryetarin Ahmeti dhe nismat e tij.