Fule viziton Kosovën

Qeveria pret nisjen e Studimit për Marrëveshjen e Stabilizim-Asociimit

Komisionari për zgjerim i Bashkimit Evropian, Stefan Fule, pritet të vizitoi zyrtarisht Kosovën. Ai pritet të arrij sot në Prishtinë.

Zëvendësministri për integrime, Gëzim Kasapolli i ka deklaruar Radio Kosovës se gjatë vizitës në Prishtinë, komisionari për zgjerim i BE-së, Stefan Fule, do të deklarojë zyrtarisht fillimin e studimit të fizibilitetit për marrëveshjen e Stabilizim Asocimit.

Raportuesja e Parlamentit Evropian për Kosovën, Ulrike Lunacek, para një jave ka bërë me dije, se nëse gjithçka shkon mirë, studimi i fizibilitetit mund të përfundojë brenda këtij viti.

Ajo ka thënë se nuk ka garanci se pas studimit të fizibilitetit do të pasojë negocimi i Marrëveshjes së Stabilizim-Asociimit, për shkak të pesë vendeve hezituese të BE-së, por, sipas saj nëse ky studim del pozitiv, ajo beson në një zgjidhje pragmatike, raportojnë mediat kosovare.

Qeveria e Kosovës ende nuk e di se kur kosovarët do të lëvizin lirshëm në vendet e Bashkimit Evropian.

Ministrja e Integrimit, në një intervistë për “Express”, Vlora Çitaku thotë se aktualisht e sigurt është se udhërrëfyesi do të vijë në fund të pranverës.

Sipas saj, të martën, komisioneri Fule konfirmon nisjen e Studimit për Marrëveshjen e Stabilizim-Asociimit.

Çitaku ka thënë se presin një vlerësim të shpejtë të BE-së për gjendjen në Kosovë dhe nisjen e hapave të Prishtinës drejt Unionit.

“Fule do të vijë në Kosovë dhe do të konfirmojë nisjen e Studimit për Marrëveshjen e Stabilizim Asociimit. Tashmë kemi indikacione që ky studim me rekomandime do të publikohet në vjeshtë, në muajin tetor, ndërkohë që lansimi zyrtar do të bëhet me vizitën e Komisarit”, ka deklaruar Çitaku, për Express.

Përgjegjësja për integrimin e Kosovës në BE ka folur edhe për liberalizimin e vizave, por nuk ka përmendur ndonjë datë të saktë se kur do të vijë udhërrëfyesi.

“Jemi brenda agjendës, komisionerja Malmstrom ka thënë që gjatë pranverës do të vijë udhërrëfyesi në Prishtinë. Ndonjë datë zyrtare nuk është dhënë, megjithatë ne kemi të konfirmuar se udhërrëfyesi është hartuar dhe tani është për komente te vendet anëtare të BE-së”, ka thënë Çitaku.