Fushatë kundër degradimit të pyjeve

Qeveria e Finlandës ka mbështetur një fushatë vetdijseuese për qytetarët e Kosovës për mbrojtjen e ambientit. Bëhet thirrje të mbrohen pyjet nga degradimi  

Prerja e pakontrolluar e pyjeve e ka degraduar maksimalisht kulturën pyjore të Kosovës, duke i kthyer shumicën e zonave malore në shkurre dhe drunj të panevojshëm. Për të tërhequr vëmendjen se pyjet janë vetë jeta, Qeveria e Finlandës ka mbështetur një fushatë vetdijseuese për qytetarët kosovarë për mbrojtjen e ambientit.

Reklamat janë pjesë e një përpjekjeje të FAO dhe Ministrisë së Bujqësisë, Pylltarisë dhe Zhvillimit Rural për të tërhequr vëmendjen lidhur me trendin alarmant të degradimit të pyjeve i cili po prek vendin.

“Pyjet mbulojnë 42 për qind të tokës në Kosovë, por praktikat e pakontrolluara dhe të paqëndrueshme në dekadat e fundit kanë rezultuar në stagnimin e zhvillimit të sektorit pyjor dhe degradimin e pyjeve. Shkaqet kryesore të degradimit në Kosovë janë prerja e paligjshme, zjarret e pyjeve dhe përdorimi joefikas i drurit si burim i energjisë”, thuhet në kumtesën e FAO-s.

Reklamat e reja për shërbimin publik kanë për qëllim të rrisin ndërgjegjësimin dhe njohuritë e njerëzve për rëndësinë mjedisore, ekonomike dhe sociale të pylltarisë në Kosovë, veçanërisht në kontekstin e ndryshimit të klimës.

“Shumica e njerëzve nuk e kuptojnë ndikimin e tyre në pyje duke marrë pjesë në këto aktivitete”, ka thënë Aleksandar Nikollovski nga FAO, këshilltar kryesor teknik i projektit. Pyjet në Kosovë, siç thuhet, nuk janë vetëm të bukura, por një burim i çmuar i vendit.

“Nëse duam që gjeneratat e ardhshme të vazhdojnë të përfitojnë prej tyre, ekologjikisht, shoqërisht, dhe ekonomikisht, atëherë patjetër duhet ta bëjmë një ndryshim”, konsideron ai.