Futbolli italian në kaos, rreziku nga virusi

Numri i viktimave nga Coronavirusi është rritur në Itali dhe emergjenca ka kapur kufirin maksimal

Nga virusi vdekjeprurës është prekur edhe futbolli pasi katër ndeshje të javës së 25-të u shtynë, kurse tashmë duke iu referuar deklaratave të kryeministrit italian Giuseppe Conte mund të shtyhet e gjithë java e 26-të përfshirë edhe super sfidën e mes Juventusit dhe Interit. Problemi qëndron se nuk ka data të lira se kur mund të riluhen sfidat e shtyra për faktin se disa skuadra janë të angazhuara në Kupat e Evropës dhe në verë është Evropiani dhe kampionati duhet të mbyllet disi më herët. Zyrtarët më të lartë të Federatës Italiane të Futbollit dhe ata të ligës së futbollit po diskutojnë për masat që do të marrin për javën e 26-të e Serisë A, pasi qeveria ka kërkuar që deri në 1 mars të mos zhvillohet asnjë aktivitet sportive, përcjell albinfo.ch.

Një tjetër opsion është që të gjitha ndeshjet e kësaj jave të luhen me dyer të mbyllura, ndërkohë që klubi i Juventusit e përjashton një hipotezë të tillë për supersfidën ndaj Interit dhe do t’i kërkojë federatës që kjo ndeshje të luhet në një fushë neutrale me praninë e tifozëve.

Me dyer të mbyllura

Sfida e kthimit e raundit të 1/8-ave në Ligën e Evropës mes Inter dhe bullgarëve të Ludogorets do të luhet të enjten në San Siro siç është në program, pavarsisht frikës nga Coronavirus.

Duke iu referuar asaj çfarë shkruajnë mediat italiane Inter-Ludogorets do të luhet pasi skuadra zikaltër ka kalendar të ngjeshur dhe nuk ka data të lira për t’u riluajtur kjo sfidë më pas kjo edhe për faktin se njëra mes dy skaudrave do të luajë në raundin e 1/8-ave me ndeshjet e para të kësaj faze që do të zhvillohen pas dy javësh. Kështu që të gjitha gjasat janë që Inter-Ludogorets të luhet të enjten, por pa praninë e tifozëve në stadium.

---