Gabimisht u dërgohet letër 100 qytetarëve të BE-së se do të dëbohen nga Britania

Në mesin e atyre 100 janë përfshirë profesorë dhe intelektualë të cilët punojnë dhe me  pagat e tyre dhe paguajnë taksat

Ministria e Brendshme e Britanisë  (Home Office) ka tronditur 100 qytetarë të BE-së, duke u dërguar atyre letra, ku u thoshte se do të deportohen nga Britania, e më pas u tha se ishte “gabim i administratës”, përcjell albinfo.ch.

Një përfaqësues i ministrisë tha se janë duke “hetuar urgjentisht” këtë rast, duke siguruar qytetarët e saj dhe evropianët se qeveria e Mbretërisë së Bashkuar nuk ka ndryshuar asgjë në aspektin e statusit të qytetarëve evropianë.

“Ne jemi të vendosur absolutisht që të drejtat e qytetarëve të BE-së në territorin britanik të mbesin të pandryshuara”, tha një përfaqësues i Home Office.

Në mesin e atyre 100 janë përfshirë profesorë dhe intelektualë, të cilët punojnë dhe me pagat e tyre i paguajnë taksat.

Në rrjetet sociale këta njerëz pretendojnë të jenë të tronditur nga gabimi i autoriteteve britanike, të cilët janë të detyruar të mos bëjnë asgjë për statusin e qytetarëve evropianë, të paktën deri në dalje formale të Britanisë nga BE-ja në mars 2019.

Letra thoshte se ata kanë një muaj kohë për t’u larguar nga Britania e Madhe, e në qoftë se refuzojnë, do të merren me forcë në një qendër pritjeje dhe nga atje deportohen në ato vende nga kanë ardhur.