Gërvalla jep detaje për takimet në Bruksel

Në një njoftim përmes rrjeteve sociale, ministrja e Punëve të Jashtme, Donika Gërvalla, ka bërë të ditur se në Bruksel, bashkë me kryeministrin Albin Kurti dhe zëvendëskryeministrin e parë, Besnik Bislimi, kanë zvilluar takime të shumta, përcjell albinfo.ch.

Ajo ka shkruar në Facebook se kishte biseda të “frytshme me theks të veçantë në integrimin e Kosovës në Bashkimin Evropian”.

“Sot gjatë gjithë ditës, së bashku me Kryeministrin Kurti dhe zëvendëskryministrin Bislimi zhvilluam takime të shumta në Bruksel. Filluam me Kryministrin Belg De Croo, vazhduam me komisionerët e BE-së për bujqësi, energji, ekonomi dhe financa, drejtësi, ndërmjetësuesin e BE-së Lajçak, zëvendëspresidentin ekzekutiv të Komisionit të BE-së, Dombrovskis dhe Presidentin e Parlamentit Evropian, Sassoli. Biseda shumë të frytshme me theks të veçantë integrimin e Kosovës në Bashkimin Evropian, shtetin ligjor, reformat në ekonomi, shëndetësi dhe drejtësi”, ka shkruar Gërvalla në Facebook.

Kryeministri i Kosovës, Kurti, po qëndron në vizitë zyrtare në Bruksel, ku është takuar me zyrtarë të Bashkimit Evropian dhe do të takohet edhe nesër. Kurti gjithashtu ka deklaruar se nuk do të marrë pjesë në takimin e 11 majit në Bruksel me presidentin e Serbisë, Aleksandar Vuçiq, në kuadër të dialogut Kosovë-Serbi.