Gërvalla: Përfaqësues të disa shteteve janë të befasuar me punën tonë në veri

Zëvendëskryeministrja dhe ministrja e Punëve të Jashtme dhe Diasporës, Donika Gërvalla-Schwarz, tha se institucionet e sigurisë janë dukë bërë punë të mirë në veri të vendit, për çfarë shtoi se me punën e tyre janë befasuar edhe të tjerët që kanë vizituar atë pjesë, përcjell albinfo.ch.

Në takimin e Këshillit për Demokraci dhe të Drejtat e Njeriut ajo tha se përfaqësuesit e disa shteteve që kanë vizituar Kosovën janë shprehur të habitur se sa të pranishme janë institucionet e sigurisë në veri.

“Dua ta ndaj me ju një përshtypje që ma kanë shfaqur shumë përfaqësues të shteteve të ndryshme që kanë vizituar Kosovën edhe veriun gjatë muajve të fundit, e të cilët kanë shprehur një farë habie se sa, jo vetëm të pranishme, por edhe sa të pranueshme janë institucionet tona të sigurisë në veri”, theksoi Gërvalla.

Mes tjerash, ajo tha se nevojitet një koalicion i mbarë shoqëror për parandalimin e dhunës ndaj grave dhe vajzave.