Gjakova me zyrtarë të veçantë për diasporën

Me moton “Ti je pjesë e atdheut”, komuna e Gjakovës ofron mikpritje maksimale për bashkatdhetarët

Komuna e Gjakovës tashmë i ka bërë të gjitha përgatitjet e nevojshme në mënyrë që mërgimtarët të ndihen sa më mirë gjatë qëndrimin në këtë komunë. Kështu ka deklaruar kryetarja e komunës së Gjakovës, Mimoza Kusari – Lila gjatë një takimi që ka zhvilluar me ministrin e Diasporës në Qeverinë e Republikës së Kosovës Valon Murati.

Me këtë të fundit Kusari-Lila kryesisht ka bashkëbiseduar për përgatitjet e të dyja institucioneve për pritjen e mërgimtarëve gjatë këtij sezoni veror. Kryetarja e Gjakovës ka përmendur themelimin e zyrës së veçantë të diasporës dhe caktimin e zyrtarit për diasporë, të cilët gjatë tërë kohës do të jenë në shërbim të mërgimtarëve.

Ajo gjithashtu e ka njoftuar ministrin për lëshimin e portalit informativ të Gjakovë, www.gjakovaportal.com, në të cilin mërgimtarët mund t’i gjejnë të gjitha informacionet, qoftë ato për mundësinë e investimeve, qoftë informacionet për zhvillimet ditore, në sferën politike, kulturore, sportive e të tjera.

“E tërë fushata e përbashkët e dy institucioneve tona për pritjen e bashkatdhetarëve, do të zhvillohet nën moton “Ti je pjesë e atdheut”, moto e cila dërgon mesazhin se përkundër faktit që jetojnë e veprojnë nëpër vende të ndryshme të botës, ata janë në shtëpinë e vet sa herë që vijnë në Kosovë”, thuhet në njoftimin e Komunës së Gjakovës.