Gjermania, 17 milionë € ndihmë Kosovës

Gjermania ndanë rreth 17 milionë euro grante, për ngrohje dhe projekte të ndryshme në menaxhimin e ujërave dhe mbeturinave

Qeveria e Kosovës dhe Republika Federale e Gjermanisë kanë nënshkruar një marrëveshje bashkëpunim në fushën financiare. Sipas këtij memorandumi Gjermania ndanë rreth 17 milionë euro grante, për ngrohjen e kryeqytetit, menaxhimin e ujërave dhe mbeturinave në Kosovë.

Ambasadorja gjermane në Prishtinë , Angelika Viets tha se deri më tani Gjermania ka përkrahur Kosovën me mbi 500 milionë euro.

“Përmes këtyre projekteve Gjermania dëshiron të përkrahë Republikën e Kosovës të ofrojë perspektivë për qytetarët e saj në vendin e tyre. Furnizimi stabil me ujë dhe furnizimi i pandërprerë me ngrohje gjatë dimrit janë shërbime të rëndësishme për qytetarët e Kosovës“, deklaroi ambasadorja Viets.

Kurse, ministri i Financave, Avdullah Hoti, vlerësoi lartë këtë marrëveshje, duke thënë se këto grante të ndara  nga Gjermania për Kosovën do të shfrytëzohen për projektet të cilat janë të rëndësishme për qytetarët e Kosovës. Hoti ka falënderuar Gjermaninë për mbështetje financiare.

“Këto projekte paraqesin rëndësi të madhe për vendin dhe qytetarët e saj. Andaj pas nënshkrimit të kësaj marrëveshjeje, pritet nënshkrimi i marrëveshjeve të veçanta financiare për grant për këto projekte të lartë përmendura”, deklaroi ministri i Financave, Hoti.

Sipas këtyre granteve gjermane, pesë milionë euro shkojnë për zgjerimin e rrjetit të Termokosit në Komunën e Prishtinës. Tetë milionë euro janë ndarë për shkarkimin e ujërave të zeza në jugperëndim të vendit, ndërsa katër milionë euro do të ndihmojnë menaxhimin e mbeturinave.