Një lajm i mirë për qytetarët zviceranë që blejnë në Gjermani: pragu minimal prej 50 eurosh për rimbursimin e TVSH-së mund të hiqet që në vitin 2026. Kjo do t’u mundësonte blerësve të kërkojnë kthimin e taksës edhe për blerje me vlerë më të vogël.
Gjermania po shqyrton heqjen e kufirit minimal prej 50 eurosh për blerjet që bëjnë turistët nga Zvicra. Nëse ndryshimi miratohet dhe zbatohet sipas planifikimit, qytetarët zviceranë do të mund të përfitojnë rimbursimin e TVSH-së edhe për blerje me vlera më të vogla.
Lajmi është bërë i ditur nga gazeta gjermane Südkurier, duke iu referuar projektligjit për Ligjin Tatimor Vjetor 2026 në Gjermani.
Aktualisht, personat që blejnë në Gjermani dhe dëshirojnë të marrin mbrapsht TVSH-në duhet të shpenzojnë të paktën 50 euro në një dyqan të vetëm. Vetëm atëherë mund të pajisen me dokumentin e nevojshëm të eksportit, i cili u mundëson të kërkojnë rimbursimin e taksës.
Me ndryshimin e planifikuar, ky kufizim do të hiqej, duke përfshirë edhe blerjet nën këtë shumë.
Heqja e kufirit kushtëzohet nga aplikacioni digjital
Megjithatë, ndryshimi nuk do të hyjë në fuqi automatikisht. Kushti kryesor është futja zyrtare në përdorim e certifikatës digjitale të eksportit, e njohur si dAKZ.
Deputeti gjerman i CDU-së, Felix Schreiner, ka konfirmuar për gazetën Südkurier se heqja e kufirit minimal është paraparë tashmë në kuadrin ligjor, në momentin kur sistemi digjital të fillojë funksionimin zyrtar.
Aktualisht, aplikacioni ndodhet ende në fazën pilotuese. Sipas Zyrës Kryesore të Doganave në Lörrach, përvojat nga testimi po analizohen dhe koordinohen përpara kalimit në funksionim të rregullt.
Në projektin pilot është përfshirë edhe rrjeti i marketeve Lidl, me 25 filiale pranë kufirit zviceran. Pjesë e testimit janë edhe biznese të tjera.
Si funksionon aplikacioni i ri?
Sistemi i ri digjital synon ta thjeshtojë ndjeshëm procesin e rimbursimit të TVSH-së.
Përmes aplikacionit, blerësit do të mund të marrin një barkod, i cili skanohet në arkën e dyqanit. Në këtë mënyrë, fatura regjistrohet në formë digjitale.
Më pas, aplikacioni përdor të dhënat e vendndodhjes për të identifikuar momentin kur mallrat eksportohen përmes doganës dhe gjeneron automatikisht certifikatën e eksportit.
Kështu, blerësit nuk do të kenë më nevojë të kërkojnë vulosjen fizike të faturës në doganë, siç ndodh aktualisht, përpara se të kërkojnë kthimin e TVSH-së nga shitësi.
Për autoritetet gjermane, ky sistem pritet të sjellë edhe kursime në administratë dhe personel. Sipas Antje Bendel, zëdhënëse e Zyrës Kryesore të Doganave në Lörrach, rreth 200 punonjës përgjatë kufirit me Zvicrën merren ekskluzivisht me vulosjen e dokumenteve të eksportit.
Kur mund të hyjë në fuqi ndryshimi?
Sipas planifikimeve aktuale, kalimi i aplikacionit në funksionim të rregullt pritet të ndodhë më vonë gjatë vitit 2026.
Megjithatë, ende nuk ka siguri për datën e saktë të zbatimit. Nëse sistemi digjital nuk hyn në funksionim zyrtar sipas afatit të paraparë, kufiri minimal prej 50 eurosh do të vazhdojë të jetë në fuqi deri më 31 dhjetor 2027.
Për turistët zviceranë që udhëtojnë drejt Gjermanisë për blerje, heqja e këtij kufizimi do të ishte një lehtësim i rëndësishëm, pasi do t’u mundësonte të përfitonin nga rimbursimi i TVSH-së edhe për shpenzime të vogla.
