Gjermania i ndan edhe 27.7 milionë euro për Kosovën

Gjermania, pas SHBA-së, është donatori i dytë më i madh bilateral për Kosovën

Qeveria gjermane është zotuar për ndarjen edhe të 27.7 milionë eurove të tjera për Kosovën,  që do t’i dedikohen energjetikës, ujërave, ekonomisë dhe arsimit. Kjo u bë e ditur pas mbajtjes së konsultimeve për bashkëpunimin zhvillimor në mes të Kosovës dhe Gjermanisë.

 “Gjatë konsultimeve ndërqeveritare gjermano-kosovare për bashkëpunim ekonomik zhvillimor, të cilat u mbajtën më 12 mars 2012 në Prishtinë, Qeveria gjermane është zotuar për një mbështetje të mëtutjeshme të vendit më të ri në Evropë për të përmirësuar kushtet e jetesës dhe për afrimin e tij me BE-në”, thuhet në një kumtesë të Ambasadës e Gjermanisë  në Prishtinë.

Sipas kumtesës, të dy delegacionet u pajtuan për të forcuar edhe më tej bashkëpunimin në fushat e ekonomisë dhe nxitjes së punësimit, arsimit, si dhe energjisë e infrastrukturës së ujërave.

Për këtë bashkëpunim, qeveria gjermane planifikon – me kusht të miratimit përfundimtar të institucioneve relevante qeveritare gjermane – të vë në dispozicion 27,7 milionë euro të tjera për vitin 2012.

Në sektorin e energjisë Gjermania planifikon të mbështes sërish Qeverinë e Kosovës në ndërtimin e kapaciteteve të rrjetit të transmetimit të energjisë, ashtu që popullsia të mund të përfitojë në mënyrë të drejtpërdrejtë dhe të kontribuojë njëkohësisht në integrimin e tregut kosovar në atë evropian.

Mjetet financiare, të cilat ishin zotuar që në vitin 2010 për ndërtimin e impianteve për trajtimin e ujërave do të rriten. “Nëpërmjet kësaj jepet një kontribut i qenësishëm në përmirësimin e qëndrueshëm të kushteve të jetesës së qytetarëve kosovarë”, thuhet në njoftimin e ambasadës.

Po ashtu, me mbështetjen e zhvillimit rural dhe mbështetjen e qendrave kompetente për arsim, në kuadër të arsimit profesional, është planifikuar vazhdimi i projekteve aktuale.

“Për zhvillimin social dhe ekonomik arsimi luan një rol vendimtar. Për këtë është paraparë mbështetja e qëllimeve në vijim në arsimin themelor me mjete shtesë për një fazë të re të projekteve”, thuhet në kumtesën e Ambasadës.

Gjermania, pas SHBA-së, është donatori i dytë më i madh bilateral për Kosovën. Që nga fillimi i bashkëpunimit, në vitin 1999, qeveria gjermane është angazhuar me sukses me afërsisht 400 milionë euro për rindërtimin dhe zhvillimin e Kosovës.