Gjermania shtyn paralajmërimin e rrezikut për “vendet e treta” për 30 shtator

Nga tetori, Gjermania do të ketë kthim në një "sistem të diferencuar", në të cilin do të jepen instruksione individuale për udhëtimet dhe sigurinë për secilin vend jashtë Bashkimit Evropian

Për shkak të pandemisë së koronavirusit, Qeveria e Gjermanisë e ka shtyrë deri më 30 shtator paralajmërimin për rrezikun e udhëtimit në vende të treta jashtë BE-së. Pas kësaj date, situata do të vlerësohet individualisht për secilin vend.

Paralajmërimi i përgjithshëm për rrezikun e udhëtimit në rreth 160 vende për shkak të pandemisë, sipas Ministrisë së Jashtme Gjermane, vlen deri më 30 shtator, shkruan dw.de. Qeveria gjermane ka vendosur për zgjatjen, ka bërë të ditur një zëdhënëse e Ministrisë së Jashtme, duke shuar për momentin shpresat e sektorit të udhëtimeve. Do të ishte mirë, nëse në Evropë (BE) do të kishte një rregullore të përbashkët, ka deklaruar zëdhënësja e Ministrisë së Jashtme.

Që nga tetori vlejnë kritere të veçanta për çdo shtet që bën pjesë në “vendet e treta”.

Nga tetori, Gjermania do të ketë kthim në një “sistem të diferencuar”, në të cilin do të jepen instruksione individuale për udhëtimet dhe sigurinë për secilin vend jashtë Bashkimit Evropian, transmeton albinfo.ch.

Zëdhënësja e Ministrisë së Jashtme bëri gjithashtu të qartë, se duke patur parasysh rritjen e numrit të rasteve të koronavirusit në vende të caktuara, mund të ndodhë që para fundit të muajit të lëshohen paralajmërime udhëtimi edhe për disa vende të BE-së.

Kështu, për shembull, numri i infeksioneve të reja aktualisht po rritet shumë shpejt në Francë, përcjell albinfo.ch. Përgjithësisht edhe në të ardhmen duhen pritur kufizime të udhëtimeve, tha ajo.

 

---