Gjermania s’u jep para azilkërkuesve kosovarë

Beate Merk, ministre për Çështje Evropiane dhe Marrëdhënie Rajonale e Bavarisë, tha se është ndryshuar ligji në këtë land, që azilkërkuesve kosovarë t’u ndalohen financat  

Ministrja për Çështje Evropiane dhe Marrëdhënie Rajonale e Landit të Bavarisë në Gjermani, Beate Merk u shpreh e shqetësuar me numrin e madh të azilkërkuesve kosovarë në këtë rajon. Ajo tha se në këtë rajon është ndryshuar ligji që nënkupton se azilkërkuesve kosovar t’u ndalohet përkrahjen financiare.

Këto komente ajo i bërë pas një takimi që zhvilloi me ministrin e Punëve të Brendshme të Kosovës, Skender Hyseni

“Në landin e Bavarisë është shtuar numri i qytetarëve të Kosovës që po kërkojnë azil dhe se në këtë land janë bërë ndryshime në legjislacionin e Bavarisë, ku përfshihet edhe ndalimi i përkrahjes financiare për faktin se kërkesat për azil të kosovarëve do të procedohen brenda dy javësh”, deklaroi ajo.

Gjatë takimit, po ashtu u bë e ditur se azilkërkuesit kosovarë do të kthehen pasi që Kosova është një vend i sigurt dhe se kosovarëve nuk iu takon e drejta për azil.

Ministri Hyseni theksoi se Qeveria e Kosovës është e shqetësuar për numrin e madh të qytetarëve të Republikës së Kosovës që kërkojnë azil nëpër vende të ndryshe të BE-së.

“Liberalizimi i shpejtë i vizave është në dobi të qytetarëve të Republikës së Kosovës dhe shteteve të Bashkimit Evropian, të cilat po përballen me fluks të madh të migrimit të kosovarëve. Ky proces duhet të përshpejtohet pasi Kosova nuk duhet të mbetet vendi i vetëm i izoluar në Ballkan”, theksoi ministri Hyseni.

Në këtë takim të dy bashkëbiseduesit u zotuan se do të ndihmohet në tejkalimin e kësaj situate dhe do të shikohen mundësitë që në të ardhëm të ketë punësim sezonal, trajnim dhe aftësim profesional të qytetarëve të Kosovës në Landin e Bavarisë.