Gjermania vendos detyrimin e vënies së maskave për të gjithë

Të mërkurën, landi verior i Bremenit, i fundit nga njësitë federale, shpalli si të domosdoshme vënien e maskave mbrojtëse në gojë dhe hundë

Në luftën kundër përhapjes së mëtejshme të koronavirusit, njerëzit në të gjitha shtetet (landet) federale të Gjermanisë duhet të angazhohen edhe duke vendosur maskat mbrojtëse, shkruajnë sot mediat gjermane.

Të mërkurën, landi verior i Bremenit, i fundit nga njësitë federale, shpalli si të domosdoshme vënien e maskave mbrojtëse në gojë dhe hundë, transmeton albinfo.ch. Vendimi merret të premten dhe do të aplikohet për transportin lokal dhe blerjet duke filluar nga e hëna, ka thënë një zëdhënës i qeverisë së Bremenit.

Në të 16 njësitë federale, do të vlejë detyrimi për të gjithë njerëzit që të vendosin maskat mbrojtëse kur shfrytëzojnë  transportin publik dhe, me disa përjashtime, edhe kur bëjnë blerje.

Vetëm në kryeqytetin gjerman Berlin dhe landin afër tij, Brandenburg – jashtë kryeqytetit të tij, Potsdam – maska mbrojtëse për gojë dhe hundë është e detyrueshme vetëm në transportin publik nga e hëna, përcjell albinfo.ch. Ndërsa me rastin e hyrjes në dyqane, mbajtja e maskës vetëm “rekomandohet urgjentisht” për qytetarët.

---