Gjuha shqipe, lëndë zgjedhore në Turqi

Ministria turke e Arsimit Kombëtar, ka vendosur që gjuha shqipe dhe boshnjake të jenë lëndë zgjedhore në arsimin turk, duke filluar nga klasat e pesta

Keystone - Stambolli - Ilustrim - Facebook

Gjuha shqipe dhe gjuha boshnjake, nga vitit i ardhshëm, do të jenë si lëndë zgjedhore në sistemin e arsimit në Turqi. Kështu ka vendosur Ministria turke e Arsimit Kombëtar, sipas të cilës, dy gjuhët e miratuara nga Bordi i Arsimit dhe Edukimit do të jenë lëndë me zgjedhje duke filluar nga klasat e pesta.

Ndryshe, në tetor të vitit të kaluar mes Ministrisë turke të Arsimit dhe Universitetit Trakya ishte nënshkruar protokolli i bashkëpunimit me qëllim për të mundësuar që nxënësit të kenë njohuri të kulturave të ndryshme, dhe transmetimin ndaj brezave të ardhshëm të gjuhëve dhe dialektet që “jetojnë” në Turqi.

Programi mësimor i gjuhës shqipe dhe boshnjake, pasi u përgatit dhe u vlerësua edhe me kontributet e Drejtorisë së Përgjithshme të Arsimit Bazë të Ministrisë së Arsimit, u paraqit në Kryesinë e Bordit të Arsimit dhe Edukimit, citon KlanK.

Menjëherë pas dhënie së vendimit, kanë nisur punimet për përgatitjen e teksteve mësimore për nxënësit që nga viti i ardhshëm mësimor do të mund të mësojnë gjuhët shqipe dhe boshnjake si lëndë me zgjedhje në shkolla që nga klasa e 5-të.