Gjyqësori t’i trajtojë me urgjencë brengat e diasporës

Ministri i Diasporës, Valon Murati përcjell shqetësimet e investitorëve për sistemin gjyqësor. Ai kërkon Divizion të veçantë gjyqësor për kontestet e investitorëve të huaj

Ministri kosovar i Diasporës, Valon Murtai kërkoi nga kryesuesi i Këshillit Gjyqësor të Kosovës, Nehat Idrizi, krijimin më të shpejtë të Divizionit për kontestet e investitorëve të huaj në kuadër të Departamentit për Çështje Ekonomike të Gjykatës Themelore në Prishtinë. Ky divizion, sipas Murtatit, do të merret ekskluzivisht me investitorët nga diaspora.

Murati takoi kryesuesin e Këshillit Gjyqësor për t’i ritheksuar problemet e investitorëve nga diaspora në Kosovë lidhur me pengesat që i hasin gjatë kontesteve gjyqësore.

Në këtë takim, ministri Murati edhe njëherë kërkoi zbatimin e plotë të ligjit për gjykatat, sipas të cilit parashihet krijimi i Divizionit për kontestet e investitorëve të huaj.

“Përkundër ekzistimit të vullnetit të investitorëve nga diaspora për të investuar në Kosovë, është shumë vështirë t’i bindësh ata që këtë vullnet ta shndërrojnë në veprim, përderisa ekziston mosbesimi në funksionimin e sistemit të drejtësisë”, deklaroi ministri Murati.

Prandaj, krijimi i këtij divizioni, që është edhe obligim ligjor, sipas Muratiti, do të ndikonte në plotësimin e mozaikut të kushteve që Republika e Kosovës ofron për  investitorë potencialë nga diaspora.

Kryesuesi Idrizi, duke u pajtuar me ministrin e Diasporës u zotua se këtë çështje do ta trajtojë me urgjencë në takimin e ardhshëm të Këshillit Gjyqësor të Kosovës.