Greva e doganierëve në Greqi paralizon kufirin me Shqipërinë

Doganierët grekë kanë paralajmëruar se do t’u binden sindikatave për të hyrë në grevë 24 orë, ndërsa është paralajmëruar se asnjë automjet nuk do të mundë të kalojë në kufirin Shqipëri-Greqi gjatë kohës sa do të zgjasë greva, përcjell albinfo.ch.

Gjatë kohës së grevës në këto pika kalimi do të mund të kalojnë vetëm këmbësorët që nuk do të kenë me vete bagazhe. Greva do t’i bllokojë dy pikëkalimet kufitare të Shqipërisë që lidhen me shtetin grek,  Kakavinë si dhe Tri Urat.

“Në bazë të njoftimit të bërë nga homologët grekë, ku thuhet se në pikën e kalimit kufitar Kakavijë-Gjirokastër si dhe në pikën e kalimit kufitar Tri Urat Përmet do të zhvillohet grevë nga pala greke, duke filluar nga ora 07:00 e ditës së mërkurë, datë 30.05.2018, deri në orën 07:00 të ditës së nesërme, datë 31.05.2018”, thuhet në njoftimin e policisë së Gjirokastrës.