Gruaja që u vra në Pejë ishte punëtore shëndetësore që 20 vjet

Drejtoria për Shëndetësi dhe Mirëqenie Sociale ka reaguar pas vrasjes së Gjyljeta Ukellës sot në orët e mëngjesit, ndërkaq dorasi dyshohet se është bashkëshorti i saj, përcjell albinfo.ch.

Nga Drejtoria për Shëndetësi në një postim në Facebook bëhet e ditur se Gjyljeta Ukella për dy dekada ka shërbyer si asistente e stomatologut në Poliklinikën Stomatologjike në Pejë.

“Të tronditur thellë nga vrasja makabre e koleges tonë, punëtores shëndetësore të stomatologjisë, të ndjerës Gjyljeta Ukella. E ndjera Gjyljetë për dy dekada shërbeu si asistente e stomatologut në Poliklinikën Stomatologjike në Pejë.

Do të mbetet në kujtimet e secilit koleg për punën dhe urtësinë që e ka karakterizur personalitetin e Gjyljetes. U prehsh në parajsë!”, thuhet në postim.