Gangsterët kurdë “u shpallin luftë” rivalëve ballkanikë në Cyrih

Një bandë gangsterësh kurdë ka shqetësuar mbrëmë qytetarët në qarkun e katërt të qytetit të Cyrihut me parakalimin e tyre dhe e britmat e zëshme. Bëhet fjalë për disa dhjetëra të rinj, të cilët bandën e tyre e kanë pagëzuar “Sondame” (në kurdishte: betimi).

Ka disa ditë që në internet qarkullon një videoxhirim në të cilin një pjesëtar i këtij grupimi, i maskuar i vë zjarrin xhaketës së grupimit tjetër rival, atij me emrin “United Tribunes” (që e përbëjnë ballkanasit, kryesisht boshnjakët) dhe thërret: “Sondame Zurich!”.

Sipas gazetës “SonntagsZeitung”, botimi i djeshëm, e cila ka përcjellë më në hollësi këtë paraqitje të re, ky ritual është shpallje lufte e “Sondame” rivalit ballkanik. Video të ngjashme u kanë paraprirë “betejave” të rrugëve në shumë raste në Gjermani.

Sidoqoftë, parakalimi i mbrëmshëm i “Sondame”, kur ai filloi të marrë shenja dhune, gjegjësisht kur grupimi bllokoi rrugën, është ndaluar nga policia e cila madje ka qëlluar drejt gangsterëve edhe me plumba gome.

Policia po ashtu ka bllokuar rrugën për rreth njëzet minuta . Shumë pjesëtarë të bandës kanë ikur por rreth 30 sish janë ndaluar nga policia, dhe pasi janë kontrolluar u është dhënë urdhër që brenda 24 orëve në vijim të mos frekuentojnë këtë qark të Cyrihut.

Njohësit e skenës druajnë se me këtë demonstrim është dhënë sinjali për konflikte të ardhshme të hapura në mes të “rok grupeve”, siç e quajnë veten këto banda, të cilat njihen prej kohësh në Gjermani për dhunën që ushtrojnë.